قصة الشات من الاول للاخر وكلها لعبة صيد

اللي اوله شرط,اخره نووور,
و اللي يتكسف من بنت عمه, مايجبش منها عيال,

و يا مآمنة للرجال يا مآمنة للمية وسط غربال,

و الميل اللي يجيلك منه الريح بلوكه و استريح,

و كانت هذة الوصلة الشعبية مقدمة لريبورتاج صحفي خطيييير,

الحكاية دايماً بتبدأ من هنا


هحكيلكم النهاردة حكاية مايا,بنت زي و زيك, و زي اختك الصغيرة او بنتك,
بتلبس زينا و بتاكل و تشرب, و ممكن تكون بتروح نفس كليتك كمان,دي حتي ممكن تكون جارتك !


و بما ان مايا زي حالاتنا اول معاملتها مع النت كان صديقنا العزيز Google قررت تستخدم ذكائها و تدور علي الكلمة اللي بقالها فترة بتسمعها و هتموت و تجربها (شاااات) و جوجل ربنا يخلية و يطول في عمره محرمهاش من حاجة.

و بما ان صاحبتنا رومانتيكية و حساسة اختارت لنفسها اسم رومانسي زيها.
و دخلت برجلها اليمين,


==============================

عيلاء : هااااي انا شادي,عندي 21 سنة,لسة راجع مصر من سنة,كنت عايش مع اهلي في الخليج,و بدرس business adminstration في الAuc
بصراحة لما شوفت اسمك (اسيرة الاحزان) مقدرتش اقاوم رقته و قلت لازم اعرف ايه اللي مزعلك كدا


هااااي يا شادي,انا مايا,عندي 19 سنة, في فنون جميلة, جامعة قاهرة, و عايشة في المعادي,بصراحة انت كمان اسمك لفت نظري جداً (تحياتي لمن دمرت حياتي) قد ايه هو بيعبر عن إنسان حساس و مشاعره مرهفة



عيلاء : ياااه يا مايا,انا اتعاملت مع بنات كتير قوي في حياتي, لكن انتي البنت الوحيدة اللي حسيت انها فهمتني بالسرعة دي, واضح انك فعلاً فنانة.


مايا : شادي انت مش متخيل الcompliment الرقيقة دي احرجتني قد ايه, انا حاسة ان احنا هنفهم بعض بسهولة لان واضح ان احنا ظروفنا متشابهه,

عيلاء: مايا, انا عارف انه طلب غريب و ان احنا منعرفش بعض كفاية, بس ممكن ايميلك,انا مش متعود ادخل شات كتير, و بصراحة مقدرش اغامر بفرصة زي اني اتعرف عليكي و اسيبها تضيع من ايدي.

مايا مينفعش اعمله اد انا معرفوش,دا بردو ولد غريب,كدا هيفهمني غلط !) بصراحة يا شادي انا مش عندي ايميل,مش بحبة !!!!



عيلاء : ليه كدا , دا حتي زيه زي الشات لكن اقل زحمة, و عشان نعرف نتكلم علي راحتنا, بس واضح انك بتتخلصي مني بالذوق و مش عاوزانا نتكلم, عموماً انا اتشرفت بمعرفتك و كنت اتمني انها تطول



مايا : لا يا شادي ارجوك متقولش كدا,دا انا ما صدقت لقيت اخ و صديق يفهمني و يحس بيا,طيب بص انا بكرا إذن الله هعمل ايميل,اوك ؟


عيلاء: و انا ليا الشرف بصداقتك دي يا مايا,و اتفضلي دا ايميلي kol_el_banat_bt7bk@casanova.com

ميرفت : حاضر,إن شاء الله


عيلاء : طيب انا هقفل ناو عشان بابا محتاجني اروح اخلصلة شوية ورق في الشركة, سلام يا قمر

مايا :اوك يا شادي, تيك كير عشان عشان خاطري, بااي.

=============================================


و تتقفل اول محادثة. و نروح نتفرج علي ابطالنا,

المشهد : اوضة علي السطوح في صفط اللبن,عيلاء قاعد و مستربع بيهني نفسه بالصيدة الجديدة,
و فجأة تليفونة رن,

- آلو مين معايا ؟

- وائل انت نسيت صوتي ولا ايه ؟

- ايه دا, داليا ! ازيك عاملة ايه ؟

- ازيك...تغيب عني كل دا و معرفش عنك حاجة,هنت عليك يا وائل,
هنت عليك تسيبني بعد كل الحب للي حبيتهولك دا !

- داليا, انا قلتلك ان احنا مش هينفع نكمل مع بعض انا ملقتش فيكي فتاة احلامي اللي بدور عليها,

- لا يا وائل مش هو دا السبب, انا عارفة انت زعلان عشان رفضت اخرج معاك لوحدنا,خلاص يا سيدي انا موافقة,انا عاوزاك تعرف اني بثق فيك,
و لما رفضت مكنتش خايفة منك خااالص, و انا دلوقتي اللي بقولك اني موافقة نخرج مع بعض.

- داليا,انتي مش عارفة بفرح اد ايه لما بحس انك فاهماني, وفعلا انا كنت هبعد عنك لاني حسيت انك مش واثقة فيا,بس دلوقتي اثبتتيلي بجد انك بتحبيني,
داليا انا عاوز اشوفك بكرا,ينفع ؟

- طبعاً يا حبيبي ينفع,ايه رأيك نروح المهندسين نقعد في اي كافيه هناك ؟

-طيب تمام,هقابلك هناك قدام ماك و نشوف هنروح فين, بس حبيبتي تعالي بعربيتك يا ريت عشان انا عربيتي في التوكيل.

- من عيوني يا بيبي, اشوفك بكرا.

- هعد الدقايق يا داليا ,تصبحي علي خير يا قمري

=======================================

و غاااارت داليا, و رن التليفون بعدها, و اتصت غادة و مي و رنا و بريهان و كلهم بيقولوا نفس الكلام و بيسمعوا نفس الاسطوانات,

و اتنيلت مايا علي عينها و عملت اد لشادي

و عاشت شهور في الوهم الاسود و هي بتسمع من "شادي" قصايد الحب و الغزل و احلامه بمستقبلهم مع بعض,

و يااااه كانت بتتجنن لما تلاقيه بيغير عليها و يقولها متكلميش دا و متلبسيش دا,
ولا يا سلام علي فرحتها لما كان بيتخانق معاها عشان تقوم تصلي,
و محادثة تجر محادثة تجر محادثة,

=======================

مايا : شادي بليز قدر انك بتطلب طلب صعب قوي عليا

عيلاء: يا مايا انا محتاج اسمع صوتك جداً و بعدين فرق ايه الميل عن التليفون كله كلام,
انا نت فاكر ان انا غالي عندك قد مانتي غالية عندي, بس بجد اتصدمت ,اول رة اقدر حاجة غلط,

مايا : شادي بليز متقولش كدا انت طبعاً مهم عندي, و يا سيدي لو كلامنا علي الفون هو دا اللي يخليك تتأكد اتفضل يا سيدي نمرتي, المهم متقولش كدا تاني ابداً انت مش عارف غلاوتك عندي !!



بعدها بشهور,

===============================

عيلاء : يااااه يا مايا,انا لو كنت اعرف ان صوتك يجنن كدا كنت عملت المستحيل عشان اسمعة من زمان,
لما صوتك كدا,امال كلامك علي الحقيقة عامل ازاي !

مايا : ميرسي يا شادي

عيلاء : طب ايه يا مايا,هو احنا مش ناويين ناخد خطوة في علاقتنا دي ؟

مايا (عاوز يخطبني ! انا مش مصدقة نفسي) الحاجات دي مش انا اللي اتكلم فيها, بعدين انت لسة متخرجتش

عيلاء : انه علاقة تخرجي بإني عاوز اشوفك ؟

مايا : تشوفني ؟ هي دي الخطوة ؟

عيلاء : ايوة طبعاً و خطوة مهمة كمان,مايا انتي حبيبتي و انا حالياً بتعامل معاكي في حكم خطيبتي,يعني لازم اشوف البني ادمة اللي هتبقي شريكة حياتي و اكلمها علي الطبيعة.

مايا : كلامك مقنع يا شادي بس انا خايفة

عيلاء : انتي صدمتيني بجد يا مايا,بعد كل اللي بيننا خايفة مني ! للدرجادي مفيش ثقة, واضح اني كنت مجرد تسلية في حياتك,
عموماً انا آسف و اعتبريني مدخلتش حياتك اصلاً

مايا : شادي ارجوك استني,متقولش كدا,انا بحبك و مقدرش استغني عنك,خلاص انا مستعدة اقابلك,بس مش هقدر اقعد كتير عشان بابا و ماما,

عيلاء: يا حبيبتي انا كفاية عليا اشوفك دقيقة واحدة بس املي عيني منك .




هاااااااااااااااا اكمل ولا كفاية كدا ؟
أظن انتوا عارفين الباقي,
هتفضل مايا تتنازل و الله اعلم تنازلاتها هتوصل بيها لحد فين,
و لما يزهق صاحبنا هتعرف مايا الحقيقة,
و هيطلع شادي مش شادي,
و ال AUC هتبقي معهد لاسلكي,
و الرحاب هتبقي صفت اللبن
و هتطلع كل علاقتة بالخارج الترنج اللي ابوه الله يرحمه جابهوله من ليبيا

و في النهاية, هيروح شادي يدور علي مايا جديدة,
و هتروح مايا تدور علي مايا القديمة, بس تبقي تقابلني آخر الشارع لو لقتها

مش عاوزة موضوعي يزعل حد,
و لو في بنت لقت في نفسها حتة مايا صغيرة,تفوق قبل فوات الاوان, و متزعلش مني,

و علي الله حد يشوف الموضوع من غير ما يقيم و يرد

شــــــــــــــكــــــــــرـآ

نسال الله العافيه وحفظنا وجميع اخواتنا المسلمات

شكرا ميمو والله موضوع مهم ولازم الكل يتوعى فيه

شكررررررررررررررا

يسلمو تابعي والى الامام